Surdeig-knekkebrød

Det er få knekkebrød eg synest er så gode som dei laga med surdeig. Det vesle hintet av sur smak saman med den sprø konsistensen og frø eller anna godt på toppen er fantastisk. Mine blei ete nysteikte med ein klatt smør og litt ost, enkelt og vanvittig godt.

Denne oppskrifta fann eg på ein annan blogg («Mel, vann og salt» av Vidar Bergum), og har endra den til å passe mitt ønske. Surdeiga eg brukar er ei blanding av sammalt rug og kveitemjøl, men her kan du nok bruke den du måtte ha tilgjengeleg sjølv og justere mjølmengda etter kor våt den er. Før du skal bake knekkebrøda er det uansett nødvendig å friske opp surdeiga ca. 1 døgn før baking. Når surdeiga boblar av aktivitet er det berre å setje i gang.

Ingrediensar:

  • 60 g aktiv surdeig
  • 240 g sammalt grov rug
  • 240 g sikta rug
  • 300 g vatn
  • 1/2 ts honning
  • 6 g salt

Topping:

  • Sesamfrø
  • valmuefrø
  • flaksalt

Bland saman alle ingrediensane i ein bolle til du har ei ganske fast, men klissete deig. Dekk bollen med plastfolie og lat stå på kjøkenbenken i ca. 10-12 timar.

Forvarm steikeomnen til 200 grader med steikebrettet/pizzastein i omnen. Del deiga opp i ca. 20 emne og trill dei til bollar. Strø mjøl på kjøkenbenken for å unngå at deiga klistrar seg fast under kjevling. Kjevle ut til tynne ovale/runde emne. Strø på ei blanding med sesamfrø, valmuefrø og flaksalt og kjevle det inn i deiga på dei siste kjevletaka før knekkebrøda er ca. 2-3 mm tjukke. Steik dei på det varme steikebrettet midt i omnen i ca. 10-12 minutt, eller til dei er gylne og sprø (følg med mot slutten av steiketida). Avkjøl på rist.

Havrecookies med eit dryss havsalt

Av og til får eg akutt lyst på nysteikte, seige og søte cookies og må berre gi etter for lysta. Ekstra godt synest eg det er om eg får med havregryn som gir den nøttete smaken og litt konsistens til kjeksa. Dei har sprø overflate og kantar, medan dei framleis er mjuke og gode i midten. Toppa med litt havsalt på toppen blir desse ein herleg balanse av søtt, salt, sprøtt og mjukt.

Har du lyst på sjokolade i kjeksa kan du tilsetje ca. 150 g hakka kokesjokolade i den ferdige røra. Oppbevar kjeksa gjerne i frysaren og ta opp etter behov. Dersom du klarer å spare nokon da.

Ingrediensar:

  • 260 g smør, romtemperert
  • 200 g demerarasukker
  • 130 g sukker
  • 1 stort egg
  • 2 ts vaniljesukker
  • 140 g havregryn, lettkokte
  • 130 g havregryn, store
  • 200 g kveitemjøl
  • 1 ts bakepulver
  • 1 klype salt
  • havsalt, til topping

Forvarm steikeomnen til 190 grader. Kjør smør og sukker mjukt og luftig i kjøkenmaskin. Tilset egget og bland godt saman. Ha i vaniljesukker, havregryn, salt og bakepulver og bland igjen. Tilset kveitemjølet litt og litt til røra har blitt jamn og framleis er lett klissete. Bruk ca. 2 ss med røre på kvar cookie og form dei til runde ballar. Plasser med god avstand mellom kvar på bakepapirkledde steikebrett. Steik midt i omnen i ca. 12-14 minutt, avhengig av kor godt steikte du vil ha dei. Dryss litt havsalt over kvar cookie med ein gong dei kjem ut av steikeomnen. Avkjøl på brettet til dei er lunkne og har stivna.

Taco-suppe

Har du att restar frå tacoen i helga kan du enkelt lage ei god suppe for å bruke opp restane av både kjøtdeig og grønsaker. Topp suppa med tortillachips og forleng helga litt med ein enkel middag!


Etter helga var det att ein klatt med ferdig krydra og steikt kjøtdeig etter taco-måltidet, og sidan eg prøvar å aldri kaste mat så måtte denne brukast. Ei god suppe med tomat som base blir raskt smakfull middag med smak av tex-mex. Bruk det du sjølv har igjen av restar og topp gjerne suppa med oppkutta grønsaker, rømme, ost og tortillachips om du vil. Juster også mengda med chili opp eller ned alt etter kor sterkt du vil ha det. Har du att opphakka grøn salat kan du tilsetje dette også i suppa rett før servering.

Ingrediensar:

  • 150 g taco-kjøtdeig (ferdig steikt & krydra)
  • 1 raudlauk, finhakka
  • 1 stort fedd kvitlauk, finhakka
  • 1 grøn chili, finhakka
  • 1 ts løkpulver
  • 1 ts malt spisskummen
  • 1 ts røykt paprikapulver
  • 7 1/2 dl kjøtkraft (evt. grønsakskraft)
  • 500 g passata pomodoro (hermetiske tomat på boks i purèform)
  • 1-2 ts sukker
  • 1 raud paprika, i terningar
  • 200 g kidneybønner
  • 1/2 boks mais
  • 1/2 boks creme fraiche
  • salt & pepar

Topping:

  • Rømme
  • tortillachips
  • vårlauk, i ringar

Varm opp litt olivenolje i ein kjele som rommar litt. Ha i raudlauk, kvitlauk og chili og lat det surre på middels varme til lauken er mjuk og blank. Ha i alt krydderet og rør godt rundt. Tilset kraft og hermetisert tomat og gi det eit oppkok. Lat suppa koke i ca. 10-15 minutt. Ha i sukker for å runde av smaken. Tilset deretter kjøtdeiga, paprika, bønner og mais og lat småkoke i ca. 10 minutt ekstra. Rør inn creme fraiche og lat koke med eit par minutt. (Tilset grøn salat i strimlar om du brukar det). Smak til med salt og pepar. Server suppa med ein klatt rømme, frisk vårlauk og salte tortillachips.

Granola med dadlar & bokkveite

Januar byr ofte på ein ny og frisk start i matveien for dei fleste. Etter jula freistar det med sunne og lettare måltid. Granola var det eg starta året med og er eit super utgangspunkt for ein sunn frukost.

Denne granolaen er laga med havregryn og bokkveiteflak, og er derfor også eit glutenfritt alternativ. Dadlar og lønnesirup er brukt som søtning og gir dermed granola-blandinga ein mild og fin søtsmak. Er du glad i dadlar generelt vil dette garantert falle i smak. For deg som er meir skeptisk til dadlane, så kan eg seie at du ikkje merkar det noko særleg i det ferdige resultatet.

Granola i mormor sin gamle kopp er herleg nostalgi.
Ingrediensar:

  • 18 stk dadlar (saftige store, utan stein)
  • 150 g havregryn (bruk glutenfrie om du skal ha glutenfri granola)
  • 150 g bokkveiteflak
  • 60 g mandlar, hakka
  • 50 g kokosmasse
  • ei klype havsalt
  • 2 ss rapsolje
  • 2 ss lønnesirup

Forvarm steikeomnen til 150 C varmluft. Legg dadlane i blaut i kaldt vatn i ca. 10 minutt.

Hell av vatnet på dadlane og fjern steinane. Ha dadlar og rapsolje i ein stavmiksar og kjør til purè. Bland saman havregryn, bokkveiteflak, mandlar, kokos og havsalt i ein stor bolle. Hell daddel-purè og lønnesirup over alt det tørre og bland det godt saman med ei sleiv. Når du har fordelt det jamnt saman slik alt er blitt fuktig og legg seg i klumpar kan du fordele massen jamnt utover eit bakepapirkleidd steikebrett. Set midt i forvarma omn og lat steike i ca. 20 min, eller til det er blitt gyllent og sprøtt. Rør i det innimellom for å få det jamnt steikt. Avkjøl heilt på brettet før du har det over på tett glas eller krukke.

Franske makronar med Nutella & havsalt

Ein av mine største svakheiter når det kjem til søtt er franske makronar i alle moglege smakar. Desse har eg laga med hasselnøtter og fylt med ein smørkrem med det populære pålegget Nutella og havsalt. Kombinasjonen søtt og salt slår aldri feil.

Etter fleire år med baking av desse på ulike vis har eg også funne ut at det slettes ikkje behøver å vere avansert å få til eit vellukka resultat. Sørg berre for å lage nok, for desse godsakene får raskt bein å gå på hjå både store og små.

Ingrediensar til ca. 28 stk:

  • 130 g hasselnøttmjøl (mal nøtter til mjøl med mandelkvern)
  • 170 g melis
  • 1 ss bakekakao
  • 100 g eggekvite
  • 80 g sucker

Nutella-smørkrem:

  • 120 g smør
  • 75 g melis
  • 1 ss bakekakao
  • 1 ts ekte vaniljesukker
  • 150 g Nutella
  • ½ ts maldonsalt

Mal nøttene til mjøl i ei kvern. Ha mjølet I ein bolle saman med melis og kakao og sikt det. Pisk eggekvite i ein rein bolle på medium fart i maskin til det byrjar å skumme. Dette tek berre nokre sekund. Ha i sukkeret 1 ss av gongen medan maskina går heilt til du har brukt opp alt sukkeret. Set deretter opp farta. Når du har fått ein glansfull og stiv marengs (tek ca. 7-8 minutt) siktar du i melis-og nøtte-blandinga i marengsen. Vend inn til du har blanda godt saman og rørt ut ein del av lufta, utan at du får ei heilt rennande røre. Når det renn sakte ned av slikkepotten i ein trekant når du held den opp frå bollen er den klar.

Ha røra i ein sprøytepose med rund tipp og sprøyt ut små sirklar på størrelse med ein fem-kroning med god avstand mellom kvar på bakepapirkledd steikebrett. Slå brettet hardt i kjøkenbenken nokre gongar til du har fått slått ut eventuelle luftbobler i makronane. Lat tørke på brettet til dei har fått ei tørr overflate. Dette kan ta alt frå 30 minutt til eit par timar, alt etter kor tørt eller fuktig det er i lufta.

Forvarm steikeomnen til 150 ºC varmluft.  Steik i forvarma omn i ca. 10-12 minutt. Toppane skal vere faste på underlaget når du prøver å bevege forsiktig på dei og ha fått ei sprø overflate. Her må du berre prøve deg fram litt med den steikeomnen du har. Avkjøl heilt på brettet før du prøvar å flytte på dei.

Ha smør og melis i ein bakebolle og pisk det lyst og luftig i 5-10 min.  Ha i kakao, vaniljesukker og Nutella og pisk vidare til du får ein luftig krem. Ha i maldonsaltet og bland godt. Par saman to og to makronbotnar. Fyll kremen i ein sprøytepose og sprøyt ut små toppar på ein makronbotn og set den neste oppå. Gjenta med alle. Pynt gjerne med hakka hasselnøtter rundt kanten.