Andebryst med bringebærsaus & ratatouille

DSC_0421

Min store favoritt på middagstallerkenen er andekjøt og nettopp det stod på helgemenyen for nokre veker sidan. Andebryst med sprøstekt skinn, bringebærsaus og herleg ratatouille av ferske grønsaker.

For ca. 1 månads tid sidan var eg på ferie i Lyon i Frankrike. Den gastronomiske hovudstaden byr på fantastisk mat og flotte råvarer. Det å traske rundt på dei herlege matmarkeda med alle dei flotte råvarene og lokale produkta er eit mekka for alle matinteresserte. Utvalget av grønsaker, franske ostar, ferskt kjøt, sjømat og brød kan få ein kvar til å få lyst å sette i gong med kokkeleringa umiddelbart. Det eg alltid endar opp med å ete minst eit par gongar kvar ferie i Frankrike er andebryst. Det er det beste eg kan få! Ratatouille er ein klassisk fransk rett som passar perfekt saman med andekjøt. Her får du oppskrifta på begge deler saman med ein søt og frisk bringebærsaus. Anbefalar at du les igjennom oppskrifta før du startar kokkeleringa, slik at du får med alt og lagar i «rett» rekkefølge slik alt er klart samtidig.

DSC_0413

Ingrediensar til andebryst & ratatouille for 4 personar:

  • 4 andebryst med skinn
  • salt & peppar

Ratatouille:

  • 3 medium store sjalottløk
  • 1 oransje paprika
  • 1 raud spisspaprika
  • 1 liten aubergine
  • 1 liten squash
  • 4 store plommetomatar
  • 1 ss tomatpurè
  • 1 laurbærblad
  • 1 ts brunsukker
  • 1 neve fersk basilikum
  • nokre stilkar fersk timian
  • 1 fedd kvitløk
  • frisk persille
  • olivenolje
  • salt & peppar

Bringebærsaus:

  • 5 dl rødvin
  • 2 ½ dl andekraft (evt. storfekraft)
  • 3 ss akasiehonning
  • 1 sitron, skalet
  • fersk timian
  • salt & peppar
  • 2 dl bringebær (helst ferske)
  • 2 ss smør
  • 1 ss ripsgelè
  • timian

Start med å lage ratatouille då den skal stå og putre lengst. Kok opp vatn i ein kjele og ha i plommetomatane i 20 sekund. Hell av vatnet og flå av skinnet frå tomatane, grovhakk dei og legg til sides. Finhakk sjalottløken og ha den i ei steikepanne med litt olivenolje og la surre på medium varme til løken er mjuk og blank. Skjær paprika i terningar og ha i saman med løken i nokre minutt. Ha deretter alt over i ei skål og sett til sides. Skjær aubergine i terningar og steik den gylden og mjuk i litt olivenolje og legg til sides saman med løkblandinga. Skjær så squash i terningar og la også den surre i litt olivenolje til den blir mjuk. Ha så alle grønsakene tilbake i steikepanna og tilsett tomatane, tomatpurè, larbærblad, brunsukker, basilikum og timian. Legg på lokk på steikepanna og la det småputre på lav varme i ca. 15 minutter.

Forvarm steikeovnen til 150 ºC. Rut opp skinnet på andebrysta med ein skarp kniv slik du skjærer ned igjennom fettet utan at du snittar i kjøtet. Gni inn andebrysta med salt og peppar og legg dei i ei kald steikepanne med skinnsida ned. Skru opp varmen på svak temperatur og når du ser fettet startar å smelte skrur du gradvis opp varmen litt og litt til du får på full guffe. Når skinnet er gyldent og sprøtt og fettet er omtrent heilt smelta vekk, snur du andebrysta og steiker i ca. 1 minutt på andre sida på ganske høg temperatur slik du får steikeskorpe. Legg over i ei ildfast form og stikk eit steiketermometer inn i eit av andebrysta på tjukkaste delen og sett midt i steikeovnen. Når kjøtet har ein kjernetemperatur på ca. 56 ºC (medium stekt) kan du ta ut andebrysta og la kvile i ca. 10 minutter før du skjærer opp i stykker.

Samtidig som du steiker andebrysta på steikepanna kan du starte med sausen. Ha rødvin, kraft,honning, sitronskal og timian i ein kjele og la det koke opp. Skru ned temperaturen og la sausen redusere til ca. halvparten. Når sausen er halvert skrur du ned varmen nesten heilt og har i smør og ripsgelè og rører rundt. Smak til med salt og peppar.Tilsett bringebær og la det varme opp i ca. 2-3 minutter. Rør forsiktig slik at du beheld ein del heile bær.

DSC_0410

Rett før servering har du i kvitløk, persille og smakar til med salt og peppar i ratatouillen. Skjær opp andebrysta i fine skiver på ca. 1 cm tjukkelse og server saman med ratatouille og ein god porsjon med bringebærsaus over og topp det gjerne med litt ekstra timian.

DSC_0393

Legg att eit svar

Epostadressa di blir ikkje synleg. Påkravde felt er merka *