Boeuf Bourguignon

DSC_0969

Helg og meir tid betyr også bedre tid til langtidskokte middagsrettar og gryter. Helga er akkurat passert oss, men kanskje vil du alt no starte planlegginga til neste helgemåltid. Denne franske klassikaren er veldig enkel og lage, men treng god tid for at du skal få eit godt resultat med kjøtet. Her snakkar vi mørt og smakfullt kjøt marinert i rødvin med enkelt og rustikt tilbehør. Rett og slett ein fest for smaksløkane!

Gryta krever ikkje all verda med forskjellige «jålete» ingrediensar og utstyr, men ei god jerngryte med lokk er nødvendig. Sjølv har eg ei fra det franske merket Le Creuset og synest denne er ei fantastisk investering. Desse kan brukast både til middagsrettar på steikeplate og i ovn og er også perfekte til å lage mellom anna grytebrød i.

DSC_0950

Omtrent alle regionane i Frankrike har sin eigen variant av biffgryte, men denne er nok den mest kjente og brukte. Det fine med denne retten er at det også kan lønne seg å lage den ein dag i forveien, då vil smakane sette seg og den smakar gjerne enda bedre dagen derpå. Så skal du ha gjestar passar det fint å lage gryta dagen før, så kan du heller konsentrere deg om andre forberedelsar og sleppe stress før gjestane kjem inn døra.

Ingrediensar til gryte for 6 personar:

  • 1,5 kg høyrygg av storfekjøt (mørbrad o.l. fungerer også)
  • 750 ml rødvin (helst burgundervin)
  • 3 kvitløksfedd, knuste
  • 1 «bouquet garni» (krydderbukett av timian, persille og laurbærblad, her kan du erstatte med ca 3 ss tørka persille og 3 ss tørka timian, og to laurbærblad)
  • 70 g meierismør
  • 1 løk, kutta i terningar
  • 3 middels store gulrøtter, grovkutta
  • 2 ss hvetemel
  • 200 g bacon i strimlar
  • 300 g sjalottløk, skrella og heile (gjerne små gourmetløkar om du finn)
  • 200 g små champignonsoppar
  • salt & peppar

 

Kutt kjøtet i firkanta terningar på ca 4 cm og skjær vekk eventuelt feitt og sener. Ha kjøt, rødvin, kvitløk og krydderblandinga i ein bolle og la det marinere i romtemperatur i ca. 3 timar eller gjerne i kjøleskap over natta.

Forvarm steikeovnen til 160 grader. Ta kjøtbitane ut av rødvinen og la dei renne av litt, og la marinaden vere igjen i bollen. Smelt så 30 g av smøret i ei jerngryte og ha i dei oppkutta gulrøttene og løken og la det surre i ca. 10 min til dei blir mjuke og gyldne. Ha så over i ein bolle og sett det til sides.

Smelt så 20 g av smøret i jerngryta igjen og steik kjøtet i omgongar på ganske høg varme slik at det får ei fin steikeskorpe på alle sider. Ha så alt kjøtet og gulrot-og løkblandinga over i jerngryta igjen og skru opp på middels høg varme. Krydre med litt salt og peppar. Strø kveitemjølet over og rør rundt til kjøtet er dekt av mjølet. Ha så i rødvinsmarinaden og la det koke opp medan du rører rundt. Sett så på lokket på jerngryta og sett den inn i den forvarma steikeovnen og la koke i 2 timar.

DSC_0945

Når det har gått nesten 2 timar kan du smelte resten av smøret i ei steikepanne og steike sjalottløkane, baconet og soppen i ca 8-10 min eller til det blir gyldent. Krydre blandinga gjerne med litt ekstra av persille og timian. Ha så dette over i jerngryta med kjøtet, sett på lokket igjen og la det stå inni steikeovnen i 30 min til, eller til kjøtet har blitt mørt.

Skum av overflødig feitt på overflata om nødvendig og smak til med salt og peppar etter behov. Server gjerne gryta med litt grøn salat (som for eks. rucculasalat) og eit godt brød eller kokte nypoteter.

DSC_0962

Dette er ei nydeleg gryte som kan nytast i godt lag med ein god rødvin til, og passar perfekt som helgemiddag!

 

Legg att eit svar

Epostadressa di blir ikkje synleg. Påkravde felt er merka *