Surdeigspizza

Pizzabotn av surdeig er det absolutt beste eg får når eg skal lage heimelaga italiensk pizza. Botnen blir sprø, luftig og får ein god smak.

I desse dagar har dei fleste av oss ekstra mykje av døgnet heime og gjerne då også betre tid. Då er det perfekt å starte prosessen med å dyrke surdeig eller berre friske opp den du kanskje allereie har ståande. Eg har friska opp att min eigen surdeig og brukt tida til å eksperimentere litt med ulike oppskrifter. Mi surdeig består av 50/50 med grov rug og fint kveitemjøl og er ypperleg base til dei fleste oppskrifter med surdeig. Eg mata surdeiga mi dagen før eg laga pizzadeiga, slik at den fekk boble opp og bli aktiv. Hugs berre på at sjølv om denne oppskrifta krev minimalt med arbeid må du ha ein aktiv surdeig klar og i tillegg setje pizzadeiga minst 2 døgn før bruk. Deiga kan også gjerne stå både eit tredje og fjerde døgn i kjøleskapet og brukast når det passar.

Ingrediensar til ca. 6 stk porsjonspizza:

  • 210 g aktiv surdeig
  • 450 g vatn (romtemperert)
  • 14 g havsalt
  • 600-650 g kveitemjøl (juster etter kor våt deiga er)

Bland saman vatn, surdeig og salt i ein bolle. Tilset mjølet litt etter litt og rør godt rundt til du får ei fast men klissete deig. Strø litt mjøl på benken og hell deiga ut. Kna saman deiga og tilset den mengda mjøl du treng for å få ein passe konsistens som ikkje klebar seg fast i benken, men samstundes ikkje blir alt for kompakt. Kna deiga i ca. 7 minutt for hand til du får ein glatt og elastisk ball. Legg deiga i ein bolle der det er plass til å heve til dobbel storleik og dekk med plastfolie. Set i kjøleskapet og lat stå ca. 2 døgn, eller til deiga er heva til dobbel storleik.

Dagen du skal lage pizza tek du ut deiga frå kjøleskapet ca. 1-2 timar før steiking.

Del deretter opp i passe store emne (eg fekk 6 stk porsjonspizza av deiga) og trill forsiktig til runde ballar og dekk med eit kjøkenhandklede og lat stå medan du varmar opp pizzastein/steikebrett i omnen på 250 grader (ca. 45 minutt).

Strø mjøl på benken og bruk fingrane til å trykke deiga utover i ein sirkel før du til slutt kjevlar den ut til ein passe tynn pizzabotn på ca. 4 mm. Ha på ønska fyll og steik på den glovarme pizzasteinen til pizzaen er gyllen og fin.

Byggotto med pastinakk & hjort

Risotto eller byggotto er ein rett eg er utruleg glad i å lage sjølv om det blir alt for lenge mellom kvar gong. Risotto er fint både som forrett, hovudrett eller tilbehør og kan lagast med nesten kva som helst. Dei siste åra har eg blitt ekstra begeistra for byggryn og synest desse gir ein ekstra god konsistens til risottoen.

Denne gangen har eg smaksett byggottoen med pastinakk som gir ein lett søt smak, og servert den saman med steikt hjortefilet og rotgrønsakschips. Har du ikkje tilgong på kjøt av hjort kan du fint bruke storfe i staden.

Ingrediensar for ca. 4 personar:

  • 200 g byggryn
  • 1,5 liter kraft (gjerne av grønsaker eller kylling)
  • 3 middels store pastinakk
  • 2 sjalottlauk
  • 40 g smør
  • 1/4 dl kvitvinseddik
  • 50 g parmesan, riven
  • timian (gjerne fersk)
  • salt & pepar
  • ca. 600 g ytrefilet av hjort
  • rotgrønsakschips (gjerne heimelaga, men frå butikken funkar flott)
  • fersk timian, til servering

Ha krafta i ein kjele og gi det eit lett oppkok. Skru ned varmen og hald det varmt. Skrell pastinakken og riv den grovt på eit rivjern. Finhakk sjalottlauken. Smelt halvparten av smøret i ein stor kjele og ha i sjalottlauk og pastinakk og lat det surre på middels lav varme til lauken er blank og mjuk. Ha i kvitvinseddik og lat det koke inn litt. Tilset byggryna og resten av smøret. Rør godt rundt og lat dei steike med eit par minutt. Ha i ei ause med krafta og lat det koke inn under jamn omrøring før du har i neste ause med kraft. Fortset slik til du har brukt opp det meste av krafta, men spar litt til servering. Dette vil ta ca. 18-20 minutt. Rør med jamne mellomrom slik det ikkje brenn seg i botnen.

Medan byggottoen er undervegs kan du steike hjortefileten. Krydre med salt og pepar og steik i godt med smør og olje i ei panne på middels høg varme. Steik i eit par minutt på kvar side slik du får ei fin steikeskorpe. Skru ned varmen og lat ligge nokre få minutt ekstra (avhengig av tjukkleik på stykket og kor godt steikt du likar det). Lat kjøtet kvile i 10 minutt før du skjærer i det.

Rett før servering har du i parmesan og fersk timian i byggottoen og smakar til med salt og pepar. Dersom du synest den er for tjukk sper du ut med litt ekstra kraft. Server byggotto med tynne skiver hjort, fersk timian, parmesanflak og chips av rotgrønsaker.

Taco-suppe

Har du att restar frå tacoen i helga kan du enkelt lage ei god suppe for å bruke opp restane av både kjøtdeig og grønsaker. Topp suppa med tortillachips og forleng helga litt med ein enkel middag!


Etter helga var det att ein klatt med ferdig krydra og steikt kjøtdeig etter taco-måltidet, og sidan eg prøvar å aldri kaste mat så måtte denne brukast. Ei god suppe med tomat som base blir raskt smakfull middag med smak av tex-mex. Bruk det du sjølv har igjen av restar og topp gjerne suppa med oppkutta grønsaker, rømme, ost og tortillachips om du vil. Juster også mengda med chili opp eller ned alt etter kor sterkt du vil ha det. Har du att opphakka grøn salat kan du tilsetje dette også i suppa rett før servering.

Ingrediensar:

  • 150 g taco-kjøtdeig (ferdig steikt & krydra)
  • 1 raudlauk, finhakka
  • 1 stort fedd kvitlauk, finhakka
  • 1 grøn chili, finhakka
  • 1 ts løkpulver
  • 1 ts malt spisskummen
  • 1 ts røykt paprikapulver
  • 7 1/2 dl kjøtkraft (evt. grønsakskraft)
  • 500 g passata pomodoro (hermetiske tomat på boks i purèform)
  • 1-2 ts sukker
  • 1 raud paprika, i terningar
  • 200 g kidneybønner
  • 1/2 boks mais
  • 1/2 boks creme fraiche
  • salt & pepar

Topping:

  • Rømme
  • tortillachips
  • vårlauk, i ringar

Varm opp litt olivenolje i ein kjele som rommar litt. Ha i raudlauk, kvitlauk og chili og lat det surre på middels varme til lauken er mjuk og blank. Ha i alt krydderet og rør godt rundt. Tilset kraft og hermetisert tomat og gi det eit oppkok. Lat suppa koke i ca. 10-15 minutt. Ha i sukker for å runde av smaken. Tilset deretter kjøtdeiga, paprika, bønner og mais og lat småkoke i ca. 10 minutt ekstra. Rør inn creme fraiche og lat koke med eit par minutt. (Tilset grøn salat i strimlar om du brukar det). Smak til med salt og pepar. Server suppa med ein klatt rømme, frisk vårlauk og salte tortillachips.

Pølse-& spinatlasagne

Lasagne er den perfekte kosemat som passar like godt til kvardag som til helg. Når du høyrer ordet pølse-lasagne verkar det kanskje ikkje så forlokkende, men eg kan love deg at dette blei rett smakfullt! Smaksrike pølser av god kvalitet, kvit saus av ricotta og spinat og eit lok av smelta og sprø ost på toppen utgjer eit fantastisk godt måltid med ein grøn salat med syrlig vinaigrette ved sidan av.

Fortsett å les «Pølse-& spinatlasagne»

Sprø kyllingbitar med chili-dip

Sprø kylingbitar med knasande og krydra panering og ein god chili-dip er herleg god snack-og kosemat til helga. Det passar som ein lett smårett når du er fysen på noko salt eller som eit måltid dersom du serverer saman med ein god meksikansk salat ved sidan av. Noko å prøve for deg som er lei taco`en eller berre har lyst på noko nytt?

Fortsett å les «Sprø kyllingbitar med chili-dip»

Sennepsglasert lammelår, hasselbackpoteter & rotgrønsaker

Påska nærmar seg og då står det tradisjonen tru eit lammelår på menyen. Det er ofte høgdepunktet på matfatet for dei fleste i påskeveka, og med det rette tilbehøret som for eks. rotgrønsaker, poteter og ein god fløytesaus er du garantert suksess. Dette låret har fått eit lag med sennep-glasering med rosmarin og ein raus porsjon kvitløk og er servert med sprøsteikte hasselbackpoteter, honning-og smørsteikte rotgrønsaker og ein syndig god sjy-og fløytesaus.

Fortsett å les «Sennepsglasert lammelår, hasselbackpoteter & rotgrønsaker»

Thaifiskekaker

Det er lite som slår ferske og saftige heimelaga fiskekaker ein kvardag der fisk skal på menyen. Er du derimot lei dei vanlege fiskekakene med kvit saus er desse eit eksotisk innslag. Fiskekaker med asiatisk preg er fin variasjon til den klassiske utgåva vi brukar. Fiskekakene er laga av torsk med vårløk, raud curry paste og lime  og er servert saman med søt chilisaus.

Fortsett å les «Thaifiskekaker»