Espressoiskake med nøttebotn

DSC_0162

For deg som er glad i både iskrem og kake er ei iskake perfekt å servere som dessert på eit kvart festkakebord. Denne iskaka har ein god nøttebotn med tyggemotstand og ein iskrem med god smak av sterk kaffe. Det heile er toppa med eit lag med vaniljeiskrem og mokkabønner.

No er det ikkje mange dagane igjen til 17. mai og for mange betyr det siste planlegging av desserten til festleg lag. Og er det ein ting som høyrer 17.mai-feiringa til så er det iskrem! Ei iskake er perfekt å lage sidan du kan lage den i god tid på førehand og det berre er å ta rett opp frå frysaren å servere når den trengst. I tillegg er ei iskake flott å sjå på og noko dei aller fleste likar. Denne iskaka er laga med to typar iskremsmak, men dersom du kun vil ha den eine typen held det lenge med det fyrste laget med iskrem.

DSC_0179

DSC_0135

Ingrediensar til espressoiskake for ca. 10-12 personar:

Nøttebotn:

  • 100 g sukker
  • 3 eggekviter
  • 100 g valnøtter, grovhakka
  • 100 g mandlar, grovhakka

Espressoiskrem:

  • 6 dl fløte
  • 1 boks à 397 g kondensert søta mjølk
  • 1 ts vaniljesukker
  • 2 ss pulverkaffe + 2 ss varmt vatn

Vaniljeiskrem:

  • 4 ½ dl fløte
  • 300 g kondensert søta mjølk
  • ½ vaniljestang, frøa

Til pynt:

  • 1 pk mokkabønnesjokolade

Forvarm steikeovnen til 175 ºC. Kle ei springform på ca. 24-25 cm med bakepapir i botnen og smør rundt kantane.

Grovhakk nøttene enten med ein kniv eller i ein foodprocessor. Her kan du fint ha blanding av både store og små bitar. Ha eggekvitene i ein rein bakebolle og pisk på middels hastigheit til det begynner å skumme. Tilsett deretter sukkeret litt og litt i gongen og pisk til du har ein skinnande glatt og stiv marengs. Vend i dei hakka nøttene med ein slikkepott og hell blandinga i den smurte forma. Steik nøttebotnen midt i steikeovnen i ca. 35 minutter. Avkjøl botnen heilt i forma og løsne deretter kaka frå springforma med ein skarp kniv langs kanten.

Så kan du lage espressoiskremen. Ha fløte, kondensert mjølk og vaniljesukker i ein stor bolle. Bland pulverkaffe og varmt vatn i eit lite glas og rør det saman til det løyser seg opp. Ha kaffeblandinga i fløten og det andre og pisk saman alt i kjøkkenmaskin til du får ein luftig og tjukk krem. Hell espressoiskremblandinga over den avkjølte nøttebotnen i springforma og glatt ut på toppen. Sett kaka i frysaren og la den stå til den er heilt fryst, ca. 4 timar.

Lag vaniljeiskremen ved å blande saman fløte, kondensert mjølk og vaniljefrø og piske det luftig og tjukt. Hell blandinga over i ei brødform eller liknande og sett i frysaren. La vaniljeiskremen stå i frysaren til den er nesten heilt gjennomfrossen, men framleis er mjuk nok til å kunne sprøytast ut i ein sprøytepose. Rør rundt litt i iskremen og ha den over i ein sprøytepose med stjernetipp. Sprøyt ut små toppar med vaniljeiskrem over toppen av heile espressoiskremkaka, men la det stå igjen ca. 1 cm ut til kanten heile vegen rundt kaka. Sett tilbake i frysaren og la det stå i ca. 1-2 timar slik at kaka er heilt fryst. Dersom du ikkje vil ta deg bryet med å sprøyte ut toppar på kaka kan du piske vaniljeiskremen og helle blandinga som eit nytt lag på toppen av den fryste espressoiskremen før du fryser den på nytt.

Ta ut kaka frå frysaren rett før servering og dekorer med mokkabønner rundt kanten langs kaka og litt finhakka mokkabønner på toppen. Nyt til det fulle saman med ein kopp kaffe!

DSC_0170

DSC_0160

Legg att eit svar

Epostadressa di blir ikkje synleg. Påkravde felt er merka *