Kylling-& karrisalat i wrap

Kylling og karri er ein kombinasjon som alltid slår an og det gjeld også i denne påleggs-salaten. Pakka inn i ei grov tortillalefse med grøn salat blir dette eit godt lunsj-måltid med mykje god smak.

Kyllingsalaten er super å lage dersom du har restar av kyllingkjøt frå middagen eller når du berre har lyst å lage opp eit godt pålegg til å fylle i tortillalefse, baguette eller på brødskiva. I tillegg er det ein fin måte å piffe opp matpakken med det kjipe pålegget på. Denne porsjonen rekk til ca. 4-6 tortillalefser (du treng ikkje alt for store mengdene i kvar) og held seg fint i kjøleskapet i ca. 3 døgn.

EIqetpIzQfi4lyupcxlivg_thumb_7644

Ingrediensar til ei middels stor skål:

  • 200 g kyllingkjøt, ferdig steikt og avkjølt
  • ½ liten rødløk
  • 1 raudt eple (gjerne Lady Pink)
  • 1 dl lettrømme
  • 1 dl majones
  • 1 ts sennep
  • 2 rause ts karrikrydder
  • 1 ss grasløk, finhakka
  • ½ ts røkt paprikapulver
  • 2 ts sweet chilisaus
  • 1 ts sukker
  • 1-2 ss mais
  • salt & pepar

Skjær opp kyllingkjøtet i små bitar, finhakk rødløk og skjær eplet i små terningar. Ha det i ein bolle. Finn fram ei skål og bland saman rømme, majones, sennep, karri, paprika, grasløk, chilisaus og sukker. Ha i mais og smak til med salt og pepar. Juster eventuelt med meir krydder eller rømme etter kor mykje smak du likar. Hell karri-dressingen over i bollen med kylling og bland det godt saman. Server på ønska type brød saman med grøn salat og gjerne nokre agurkskiver.

Tips: Fyll gjerne i heimelaga tortillalefser etter denne oppskrifta. Eg bytta ut litt av kveitemjølet med grovt sammalt kveitemjøl og lagde færre og større lefser av deiga.