Lammegryte med tomat

Lammekjøt er noko eg er utruleg glad i og kan brukast til det meste. Ein pakke med fårikål-kjøt i frysaren vart denne gongen brukt til eit anna føremål enn fårikål, og blei til denne smakfulle gryta med tomat og grønsaker.

Oppskrifta til suksess med rettar av fårikål-kjøt er lang koketid. Då får ein mørt og godt kjøt som smakar nydeleg. Gryta er enkel å lage sjølv om det krev eit par timar koking for å få godt resultat. Det er heldigvis verdt det! Saman med retten smakar det godt med noko så enkelt som brød med ein klatt smør på.

EpHo5rRHQAaX2qNw9h05Cg_thumb_7337

Ju0T6zPOQSSwuuP7N78igw_thumb_7356

Ingrediensar for 4 personar:

  • ca. 1 kg fårikål-kjøt
  • salt & pepar
  • 2 ss kveitemjøl
  • smør, til steiking
  • 1 løk
  • 2 store gulrøter
  • ½ sellerirot
  • 2 fedd kvitløk
  • 2 ½ dl kraft (kjøt/grønsaks-kraft)
  • 2 x 400 ml hermetisert hakka tomat, av god kvalitet
  • 1 laurbærblad
  • 2 ts paprikapulver
  • 250 g kvite bønner (hermetiserte)
  • salt & pepar
  • fersk persille

Krydre kjøtet godt med salt og pepar. Strø kveitemjøl over og vend det rundt til alle kjøtstykka er dekte. Varm opp ein stor kjele og ha i ein klatt smør. Steik kjøtet i omgongar til det får steikeskorpe på alle sider og legg til sides. Skjær løk, gulrot og sellerirot  i grove bitar og terningar. Lat det surre i litt smør i kjelen eit par minutt. Knus kvitløksfedda og ha i kjelen. Lat det surre med eit ekstra minutt. Deretter har du i kraft, tomat, laurbærblad og paprikapulver. Gi det heile eit oppkok. Lat småkoke under lok i ca. 2- 2 ½ time, eller til kjøtet er møyrt og losnar frå beinet. Ha i kvite bønner ca. 5 minutt før servering og lat dei bli gjennomvarme. Smak til med salt og pepar. Strø over fersk persille og server saman med godt brød.