Lammekotelettar i form med kantareller & fløtesaus

DSC_0785

Lammekjøtet er fortsatt i sesong i butikkane og er perfekt i alle haustrettane. Her har dei fått smak av rosmarin og er servert saman med stekt kantarell, sopp, rødløk og fløtesaus i form i ein ujålete og rustikk middagsrett.

Retten er perfekt når du har lyst på ein god koserett med tradisjonelle smakar utan å bruke særleg med tid på kjøkkenet. Den ferske rosmarinen gir ekstra god smak og er sjølvsagt tilbehør til lammekjøt. Eg kan rett og slett ikkje få nok av alle dei gode rettane med lam og nyter at vi er inne i det eg synest er den beste matsesongen i året.

DSC_0776

Ingrediensar til lammekotelettar med tilbehør for ca. 4 personar:

  • ca. 1 kg lammekotelettar
  • sitronsaft
  • 2 ts fersk rosmarin, finhakka
  • salt & peppar

Kantarell-og fløtesaus:

  • 150 g kantarellar
  • 150 g mini champignonsopp
  • 1 ½ stor rødløk
  • 2 fedd kvitløk, knust
  • 4 dl matfløte
  • 3-4 stilkar fersk rosmarin, grovhakka
  • 1 ss dijonsennep
  • salt & peppar
  • olivenolje & smør til steiking

Tilbehør:

  • Kokte mandelpoteter
  • rucculasalat

Forvarm steikeovnen til 200 ºC.

Riv opp kantarellen i passande bitar og steik den og champignonsoppane i tørr steikepanne på medium høg varme i eit par minutter. Ha så i litt olivenolje og ein liten klatt med smør. Skjær rødløk i båtar og ha i saman med soppen og steik til soppen har fått godt med farge og rødløken har mjukna. Bland inn kvitløk, matfløte, rosmarin og dijonsennep og la det koke opp. Smak til med salt og peppar og ha blandinga over i ei ildfast form.

Krydre lammekotelettane godt med salt og peppar og rosmarin. Skvis over sitronsaft og steik kotelettane i litt olivenolje i ei steikepanne på høg varme i ca. 2 minutter på kvar side slik dei får ei gylden og fin steikeskorpe. Legg kotelettane på toppen av sopp-og fløteblandinga i forma. Strø over litt ekstra rosmarin og sett inn i den forvarma steikeovnen og la steike vidare der i ca. 10 minutter.

DSC_0803

Server retten saman med kokte mandelpoteter eller liknande og ein grøn salat. Lettvint og rask kosemat med gode tradisjonelle haustsmakar!

Legg att eit svar

Epostadressa di blir ikkje synleg. Påkravde felt er merka *