Paris-Brest & Eclair

DSC_0822

Festsesongen er i gong og kakeborda skal fyllast opp. Franske bakverk finn du i uendelig mange variantar og utgåver, og ikkje utan grunn har desse fått ein stor plass i mitt kjøkken. Denne gongen er det den tradisjonelle Paris-Brest som er ei slags vannbakkelskake fylt med ein hasselnøttkrem. Så kanskje blir den tradisjonelle bløtkaka bytta ut denne gongen?

Den opprinnelige kaka blei til i 1910 då ein organisator ville bestille ei kake som skulle serverast ved mållinja etter eit sykkelritt i Frankrike, Paris-Brest-Paris. Forma på kaka (ringen) representerer eit sykkelhjul. Har du heller lyst å ha fleire små porsjonskaker kan du heller lage eclair av samme røra.

DSC_0832

Både kake og eclair er laga av «choux pastry» som er grunnoppskrift til mange andre franske bakverk også. Ringen er toppa med mandelflak og inni er det ein vaniljekrem som er piska saman med pralinè av hasselnøtter og smør.

Ingrediensar til  vannbakkelskake/eclairs med fyll:

1 porsjon Choux pastry:

  • 100 g meierismør
  • 2 ½ dl vatn
  • 12 g sukker
  • ei klype salt
  • 125 g hvetemel
  • 3-4 egg

Crème patissière:

  • 4 eggeplommer
  • 50 g sukker
  • 25 g hvetemel
  • 350 ml heilmelk
  • 1 vaniljestang

Pralinè mousselinekrem:

  • 1 porsjon crème patissière (etter oppskrift ovanfor)
  • 140 g smør
  • 90 g pralinè (oppskrift her)

Andre ingrediensar:

  • egg til pensling
  • mandelflak
  • melis til pynt

Forvarm steikeovnen til 200 ºC. Start med å lage choux pastry til vannbakkelsringen. Ha vatn, sukker, salt og smør i ein kjele og kok opp til alt smøret er smelta og blanda saman med vatnet. Ta kjelen av varmen og ha i alt hvetemelet og rør godt rundt til det blir ein klissete deig. Ha kjelen tilbake over middels varme for å tørke ut blandinga. Fortsett og røre rundt i ca. 30 sekund til deiga ikkje lenger klistrar seg til kjelen og samlar seg til ein glatt deig. Ha deiga over i ein bakebolle og la den kjøle seg ned litt før du har i egga eitt og eitt i gongen. Her må du sjå ann konsistensen før du veit kor mykje egg du trenger. Eg sjølv brukte 3 store egg. Rør godt mellom kvart egg du har i til deiga samlar seg igjen. Rett konsistens har du når røra er glatt og smidig og henger som ein spiss ned frå ein slikkepott utan å vere verken rennande eller tørr og kompakt. Ha så over i ein sprøytepose med rund tipp.

På eit bakepapirkledt steikebrett kan du tegne opp ein sirkel ved hjelp av ei springform på ca. 23 cm. Sprøyt så ut ein sirkel med røre langs den tegna sirkelen. Så sprøyter du ut enda ein sirkel på innsida av den fyrste, og tilslutt ein sirkel oppå midten av dei to andre. Pensle så toppen forsiktig med egg og strø over mandelflak. Sett ei ramekinform med kokande vatn på eit brett nederst i ovnen. Så sett du inn vannbakkelsringen midt i steikeovnen og steiker det i ca. 20 min. Skru så ned til 160 ºC og steik vidare i ca. 20 min til for å tørke ut deiga. Kaka skal sjå ganske så gylden og nesten litt brent ut når den er ferdig for at den skal vere sprø på utsida og ikkje kollapse etter du tek den ut. Avkjøl heilt på rist før du har i fyllet.

Velger du å lage eclair av røra sprøyter du berre ut ca. 10 cm lange striper av røre på steikebrettet med ca. 5-6 cm mellomrom mellom kvar av dei. Steik ellers på samme framgangsmåte som Paris-Brest kaka, men la dei stå ca. 5 min kortare i ovnen på siste steikeintervall ved 160 ºC (steiketid vil då vere 20 min på 200 ºC + 15 min på 160 ºC).

Lag så crème patissière. Ha eggeplommer og sukker i ein bolle og pisk det i 3 minutter. Ha så i hvetemelet og bland godt. Del vaniljestanga på langs og skrap ut frøa. I ei tjukkbotna kjele kan du ha i melka, vaniljefrø og den delte vaniljestanga. Kok opp melka medan du rører rundt litt innimellom. Ta panna av varmen når den kokar og fjern vaniljestanga. Hell eggeplommeblandinga ned i melka medan du rører rundt, slik at du ikkje får koagulerte eggebitar.  Ha melka over varmen igjen og la det koke opp over medium varme medan du rører godt rundt heile tida. Så snart blandinga begynner å koke piskar du rundt i 8-tal i panna i 1 minutt for å koke ut hvetemelet. Pass på så blandinga ikkje skiller seg eller blir «stekt». Hell så blandinga gjennom ei sil og over i ein stor bolle for å kjøle den ned raskt. Ha eit lag med plastfolie over, i direkte kontakt med kremen for å unngå størkna overflate, og kjøl den ned i kjøleskap i 1 time. Kremen skal ha romtemperatur når du lagar mousselinekremen.

Rør godt rundt i crème patissière og sjekk at den har romtemperatur. Er den for kald lar du den stå på kjøkkenbenken litt, er den fortsatt for varm så lar du den stå i kjøleskap ei stund til.

I ein bolle har du i smøret og piskar det med ei kjøkkenmaskin til det er mjukt. Ha så i pralinèpaste og til slutt har du i crème patissière medan du gradvis setter opp hurtigheita på miksaren. Pisk det litt til du har fått inn ein del luft i kremen og den blir «fluffy» og fløyelsmjuk. Ha så kremen over i ein sprøytepose med stjernetipp.

Del Paris-Brest kaka i to på sideveien slik at du får ein botn og eit topplokk. Sprøyt kremen på botnen i eit fint mønster og sett så på toppen. Oppbevar kaka i kjøleskap og ta ut 30 min før servering, og dryss litt melis over.

DSC_0813

Har du laga eclairs stikk du 2 små hol på undersida av kvar av dei og sprøytar inn pralinèkrem ved hjelp av sprøytepose med liten tynn spiss tipp. På oversida kan du smøre eit lag sjokoladeganache og litt hakka hasselnøtter over.

DSC_0838

Nyt den luftige, lett søte, nøtteaktige og mjuke kaka/eclair til ein kopp kaffè og drøm deg til ein fortauskafè i Paris!♥

 

Legg att eit svar

Epostadressa di blir ikkje synleg. Påkravde felt er merka *