[dropcap]L[/dropcap]uciadagen nærmar seg og nok ein gong fikk eg lyst å eksperimentere litt med safran og bolledeig. Lussekattane er eg veldig glad i som dei er i den originale utgåva, men eg synest allikevel at det er godt å kunne variere litt. Denne varianten har ein vaniljekrem som er smakssatt med klementin inni og eit lag med sukker på toppen. Bollane blei smakfulle, saftige og veldig luftige!
Safranen i gjærdeiga harmonerer fint saman med det søte sukkeret på toppen og den litt halvbitre og friske smaken av klementinen i vaniljekremen. Om du ikkje er glad i klementin eller sitrusfrukt kan du fint droppe å tilsette det i vaniljekremen og heller lage dei med vanleg vaniljekrem eller også utan noko fyll i det heile. Oppskrifta på klementin-vaniljekremen held til meir enn bolledeiga her, men den kan du bruke saman med frukt eller til dessert. Sjølv laga eg også nokre vanlege lussekattar av deiga og fikk derfor mykje vaniljekrem til overs. Oppskrifta på sjølve safranbollane er den same som eg brukte på safransnurrar med pistasjsmør tidlegare, men eg legg den ut igjen her også.
[recipe-foody]Ingrediensar til ca. 18 stk safranbollar:
Safranbolledeig:
- 5 dl heilmjølk
- 0,5 g safran
- 50 g ferskgjær
- 175 g sukker
- 1, 1 kg hvetemel
- 10 g salt
- 1 egg
- 150 g smør, romtemperert og i terningar
Klementin-vaniljekrem:
- 2 dl heilmjølk
- 1 ½ dl fløte
- 1 vaniljestang
- 2 eggeplommer
- 1 egg
- 75 g sukker
- 25 g maizena
- ½ dl klementinjuice, bruk ein søt og smakfull klementin for best resultat
- 1 klementin, finrevet skal
- smelta smør, til pensling
- sukker, til pynt
[/recipe-foody]
For å lage deiga varmar du fyrst opp mjølka i ein kjele og har i safranen. La det stå å trekke litt i ca. 10 minutter. Ha mjølka over i ein bolle og rør ut gjæren. Tilsett deretter sukker, mesteparten av hvetemelet, salt og egg og la deiga elte i maskin i 10 minutters tid. Tilsett smøret i deiga og elt vidare i 10 minutter til, til smøret er heilt elta inn i deiga og du har ein glatt og smidig deig. Tilsett eventuelt meir hvetemel etter behov. Dekk bakebollen med plastfolie og la heve til dobbel størrelse, ca. 1 – 1 ½ time.
Medan deiga hevar lagar du vaniljekremen. Del vaniljestanga på langs og skrap ut frøa. Ha både vaniljefrø, vaniljestang, mjølk og fløte i ein kjele og varm det opp til det omtrent når kokepunktet. Trekk frå plata og la det stå og trekke. Pisk eggeplommer, egg og sukker lyst og luftig. Ha i maizena og bland det godt inn i egga. Ta ut vaniljestanga frå mjølkeblandinga og riv skalet på ein klementin over i mjølka. Ha i ½ dl klementinjuice og varm det forsiktig opp igjen. Hell ca. ein tredjedel av den varme mjølka over i eggeblandinga samtidig som du piskar godt for å unngå at det blir koagulert eggerøre. Hell alt tilbake i mjølkeblandinga i kjelen og sett det på plata. La blandinga koke opp forsiktig på lav varme samtidig som du rører godt rundt ned i botnen på kjelen med ein visp heile tida. Så snart blandinga har tjukna og såvidt begynner å boble lar du den koke forsiktig i ca. 1 minutt medan du piskar kraftig. Pass på slik at vaniljekremen ikkje koagulerer og sprekker, det skal ikkje boble og koke hardt men berre såvidt putre litt slik at kremen tjuknar og får ein konsistens som heng igjen litt på vispen. Avkjøl kremen litt før du setter den i kjøleskap til du skal bruke den.
Forvarm ovnen til 200 ºC. Del deiga i ca. 18-20 emner alt etter kor store du vil ha bollane og trill det til runde bollar. No kan du velge om du vil ha vaniljekremen inni bollane eller om du vil ha den i ei fordjupning som med skulebollar. Brett ut bollane litt og legg ca. 2 ts med vaniljekrem i midten og brett deiga rundt og klem godt saman. Sett bollane med skøyten ned på bakepapirkledd steikebrett og la heve til dobbel størrelse, ca. 1 times tid.
Sett bollane midt i steikeovnen og la dei steike i ca. 10-12 minutter, til dei er gyldne og fine. Avkjøl på rist. Pensle bollane med smelta smør og dypp dei i sukker. Server umiddelbart og nyt smakane!
