Sarah Bernhardt

DSC_0096

Desse små konfektkakene høyrer garantert med til julebaksten i mange heimar som også her i huset. Eg har laga desse godbitane til kvar jul dei siste åra og synest dei er like gode kvar gong. Sarah Bernhardt-kakene består av ein seig mandelbotn med ein smørkrem med mokkasmak og eit tynt lag med sjokolade utanpå.

Oppskrifta på desse konfektkakene har eg bytta ut litt for kvart år, men dei blir ganske så like på smak kvar gong og er uansett like vellykka. Dei er veldig lette å få til og krever berre litt tolmodigheit då dei skal avkjølast mellom kvart steg av prosessen.

Ingrediensar til ca. 28 stk. Sarah Bernhardt konfektkaker:

Mandelbotn:

  • 250 g mandler
  • 200 g melis
  • 3 eggekviter (à ca. 30-35 g)

Smørkrem:

  • 200 g smør, romtemperert
  • 180 g melis
  • 2 eggeplommer
  • 3 ss avkjølt sterk kaffe (evt. 1 ss pulverkaffe + 1 ss varmt vatn)
  • 2 ½ ss bakekakao

Pynt:

  • 250 g mørk kokesjokolade
  • evt. finhakka mokkabønner/nøtter til pynt

Forvarm steikeovnen til 180 ºC.

Mal mandler til fint mel i ei mandelkvern eller evt. bruk ein foodprocessor og bland saman med melis. Tilsett litt og litt eggekvite til du får ein fast men klissete og samanhengande deigmasse. Ha over i ein sprøytepose og sprøyt ut runde sirklar på (ca. 4 cm i breidde og 1 ½ cm i høgde) bakepapirkledd steikebrett med god avstand mellom kvar. Steik midt i ovnen i ca. 12 minutter, til dei er blitt gyldne i kantane og har fått ei sprø overflate. Avkjøl på brettet og sett dei deretter i frysaren medan du lagar smørkremen.

Kjør smør og melis saman i ei kjøkkenmaskin til det blir mjukt og luftig. Pisk eggeplommene lyse og luftige i ein eigen bolle og tilsett litt og litt i smørblandinga medan maskina går på sakte fart. Ha deretter i kaffe og kakao og bland godt. Pisk kremen til den er blitt fin og luftig og ha over i ein sprøytepose. Ta ut botnane frå frysaren og sprøyt ut små toppar med smørkrem på kvar mandelbotn. Sett tilbake i frysaren slik at kremen stivnar og la det stå i ca. 1-2 timar, eller til dei er frosne.

Smelt kokesjokolade forsiktig over vannbad og temperer sjokoladen for å få eit fint og blankt resultat. Den smelta sjokoladen skal ha ein temperatur på ca. 55 ºC (for mørk sjokolade). Trekk sjokoladen frå kjelen og la temperaturen synke til ca. 28-29 ºC. Sett så sjokoladebollen tilbake over vannbadet og varm forsiktig opp igjen til 31 ºC. Ta dei frosne botnane ut frå frysaren og sett dei klar på eit brett. Dypp kvar småkake oppned i sjokoladen til du har fått dekt smørkremen og strø gjerne med litt hakka sjokolade eller nøtter på toppen. Avkjøl i kjøleskapet til sjokoladen har stivna. Oppbevar i kjøleskap eller gjerne i frysar for lengre holdbarheit. Dei er supre å ta opp og servere til uventa gjestar og tinar på kort tid.

DSC_0087

Legg att eit svar

Epostadressa di blir ikkje synleg. Påkravde felt er merka *