[dropcap]S[/dropcap]urdeig har blitt meir og meir populært dei siste åra og trenden veks stadig. Baking med surdeig gir ein fantastisk smak og er mykje bedre for magen.
Surdeig er langt i frå nokon ny måte å bake på, og det er nettopp dette som er så fint. God gammal tradisjon er på veg tilbake når det gjeld både baking og matlaging. Dette vil då seie at ein får gode kvalitetsprodukt som er sunne og smakfulle og utan alle desse kunstige tilsetningsstoffa. Mange som meinar dei har glutenintoleranse tåler bakst med surdeig fint, og det vil kanskje då seie at det heller er overgjæring og måten ein lagar bakverka på som er problemet for mange.
Sjølv har eg merka stor forskjell på det å spise brød med surdeig kontra brød som er brukt masse gjær i og er hurtigheva. Magen er mykje meir fornøgd med surdeigsbrød og smaksmessig er surdeiga den store vinnaren. Brøda og bakverka med surdeig gir ein fantastisk god og lett syrleg smak og brøda får ein saftig konsistens inni og ei sprø og flott skorpe på utsida. Det å lage surdeig er slett ingen heksekunst og tek ikkje så lang tid som det kanskje ser ut til. Sjølve surdeiga treng ca. 1 vekes tid frå du lagar den til den er klar for baking, men det er ikkje mange minutta du brukar pr. dag for å klargjere den. Har du fyrst klar surdeig så har du surdeig i månedsvis. Då treng den berre å friskast opp ca. 1 gong i veka for å halde liv i den og oppfrisking dagen før du skal bake med den.
Det finnest mange oppskrifter og framgangsmåtar på surdeig, men den eg stort sett brukar er Schakenda si oppskrift og framgangsmåte. Her legg eg ved framgangsmåten han brukar, så er det berre å prøve seg fram med surdeigsbakinga for deg også!
[recipe-foody]Ingrediensar og framgangsmåte til Schakenda sin lyse surdeig:
Dag 1-2:
- 100 g sammalt grov rug
- 1 dl lunka vatn
Bland vatn og rugmel i ein bolle og dekk det med plastfolie. La bollen stå i romtemperatur i to dagar. Då skal røra ha begynt å boble og gjerne lukte litt surt.
Dag 3-4:
- 100 g hvetemel
Ta blandinga frå dag 1-2 og bland inn hvetemelet til du får ei ganske fast deig. Legg i ein rein bolle og dekk med plastfolie. La den gjære i 1-2 dagar. Den skal no vere klebrig og ha små bobler i seg.
Dag 5-6:
- 50 g surdeigbase ( frå blandinga frå dagen før)
- ½ dl lunka vatn
- ca. 100 g hvetemel
Ta av 50 g surdeig og kast resten (evt. bruk resten til å lage fleire glas med surdeig og gjer det same med den også). Bland surdeiga med vatn og tilsett hvetemel til du får ei fast deig. Legg i ein rein bolle og dekk med plastfolie og la det stå i romtemperatur i 1-2 dagar. No skal det lukte syrleg og ha små bobler under overflata, men utan at det har heva seg noko særleg.
Dag 7:
- 50 g surdeigbase
- 1 ½ dl lunka vatn
- 150 g hvetemel
Ta av 50 g surdeig og kast resten. Bland surdeig og vatn og tilsett hvetemel til ei fast deig. Ha deiga i ein rein bolle og dekk med plastfolie, og la det så stå i ca. 12-18 timar i romtemperatur. Surdeiga skal no vere klar til bruk og ha masse bobler i seg og ha heva seg opp. Om det er lite futt og liv i surdeiga er det berre å gjenta prosessen frå dag 7 i nokre dagar til.
[/recipe-foody]
Når surdeiga di er ferdiglaga og klar til bruk er det berre å leite fram surdeigsoppskrifter og sette i gong og bake. Om du ikkje skal bruke den med en gong er det berre å la den stå i tett boks eller glas med lokk og oppbevare i kjøleskap eller i kjølig romtemperatur om den ikkje skal brukast med det første. Sjølv synest eg at Norgesglass er perfekte til surdeigsoppbevaring. Om det ikkje er lenge til eg skal bruke surdeiga lar eg den stå i romtemperatur på kjøkkenbenken.
Dagen før du skal bake friskar du opp surdeiga på samme måte som ved framgangsmåte for dag 7 ( 50 g surdeig + 1 ½ dl vatn + 150 g hvetemel) og lar den stå på kjøkkenbenken til neste dag. Om du har oppbevart surdeiga i kjøleskap kan det hende den treng å gjenta prosessen eit par gongar før den er klar.
Om du har lyst på grov surdeig byttar du berre ut det lyse hvetemelet i oppskrifta med sikta rugmel frå dag 3-6 og sammalt grov rug frå dag 7. Så har du grov surdeig til dei litt grovare brødtypane.
Lykke til med surdeigsbakinga!