Surdeigs-hamburgerbrød

ODUpsB5iRd2D18vmty3hJw_thumb_7415

Ein god og smakfull burger krev også gode brød, og det aller beste hamburgerbrødet lagar du sjølv. Desse hamburgerbrøda som er laga med surdeig blir luftige, saftige og smakfulle.

Når du fyrst har fått teken på og kome inn i surdeig-bakinga så går det som ein leik og ei ny verd av brødbakst opnar seg. Surdeig gir så utruleg god tekstur og smak til brød at det finst ikkje betre etter mi meining. Baking med surdeig krev ein del tid og ein bør regne med litt ekstra tid til heve-prosessen enn med vanleg gjærbakst. Om det er verdt det spør du? Defintivt!

Surdeig gir ikkje berre bakst som er betre på smak, men er i tillegg også for mange meir skånsomt for magen. Oppskrifta eg brukar til surdeigsstarter er etter oppskrifta til bakaren i Lom, Morten Schakenda. Denne er enkel å følgje og gir godt resultat. Du finn oppskrifta hans i dette innlegget. Hugs berre på at når du skal bake med surdeig må du starte med sjølve surdeigsstarteren ei veke i forkant.

5ym%gkH+S728D74cL5EIWA_thumb_741a

Ingrediensar til 6 store hamburgerbrød:

  • 7 ½ dl kveitemjøl
  • 2 ss akasiehonning
  • 1 ½ dl aktiv surdeigsstarter (etter denne oppskrifta)
  • 2 ts salt
  • 3 dl vatn, romtemperert
  • 1 egg, til pensling
  • sesamfrø, til pynt

Ha vatn, surdeigssarter og honning i ein bakebolle og rør det saman. Tilset kveitemjøl og salt og elta deiga godt saman for hand i ca. 5 minutt. Kna deiga saman til ein glatt og smidig ball og legg til heving i bakebollen under plastfolie i ca. 2 timar.

Del deiga opp i 6 like store emne. Trill dei til runde bollar og set på bakepapirkledd steikebrett. Lat heve under kjøkenklede eller set brettet inn i steimeomnen og lat stå i minimum 12-16 timar eller til dei er dobla i storleik. Her vil heve-tida variere med grad av aktivitet  på surdeig og romtemperatur der bollane hevar. Dei hevar seg godt utover i breidde og vil nok sjå litt flate ut, men dette «puffar» seg opp igjen under steiking.

Forvarm steikeomnen til 250 ºC. Pensle hamburgerbrøda med egg og strø over sesamfrø. Når omnen er god og varm set du brettet inn på midterste rille og steiker brøda i ca. 12 minutt og bruk gjerne varmlufts-funksjon mesteparten av tida for å få ekstra heving og ei sprø og fin overflate. Avkjøl på rist og nyt dei lunkne med ønska fyll.

p.s. brøda er også supre å fryse ned til seinare bruk og varmast opp igjen i steikeomnen.

2 comments

  1. Hei! Jeg har glutenintoleranse og har derfor begynt å bake en del med surdeig, men er fortsatt nybegynner. Går det fint å erstatte hvetemel med spelt i denne oppskriften og bør jeg la deigen heve lenger dersom jeg vil at den skal bli glutenfri, eller holder det å følge oppskriften?

    1. Hei!
      Spelt er ein underart av kveite og er ikkje glutenfri, så dersom du vil bake glutenfritt må du droppe spelt og heller bruke glutenfritt mjøl som for eksempel jyttemel eller liknande. Mange som er plaga med magen kan derimot ofte tole spelt betre enn vanleg kveite og dersom du går inn under den kategorien kan du fint erstatte kveite med spelt i surdeiga. Når du skal bake med spelt er det litt annleis enn kveite sidan spelt dannar svakare glutennettverk. Speltdeig skal ikkje eltast og jobbast like mykje med som vanleg kveite, men krever ofte lenger hevetid. Så følg dermed med under heving og sett gjerne av god tid til hevinga 🙂
      Lykke til med bakinga! 🙂

Legg att eit svar

Epostadressa di blir ikkje synleg. Påkravde felt er merka *