Estragon-kylling med kantarell

[dropcap]S[/dropcap]makfulle kyllingrettar med god sjysaus og tilbehør er noko eg aldri går lei. Denne retten inneheld saftige kyllingstykke med sprøsteikt skinn, kantarellar og ein sjysaus med fløte og estragon.

Dei fleste tenkjer på bearnaisesaus når dei høyrer ordet estragon, men denne urten er også perfekt selskap til kylling. Estragon smakar litt som  ei blanding av pepar og anis og bør brukast i forsiktige mengder slik den kraftige smaken ikkje tek over. I denne retten gir estragon ein nydeleg smak til både kyllingen og sausen og du får ein svært aromatisk middagsrett. I tillegg får du ein lett syrleg og frisk smak frå kvitvinseddik. Sjølv synest eg slik sjysaus er så godt at eg lett kan slurpe i meg sausen med skei. Server retten saman med steikte poteter og grøn salat og nyt.

izYJ0lDNT3G4uX83JM3TZA_thumb_728d

AN1hrzTmRSOjSC9mw%vIvw_thumb_728a

[recipe-foody]Ingrediensar til ca. 4 personar:

  • 1 heil kylling på ca. 1,5 kg (evt. 2 lår og to bryst med skinn)
  • 200 g kantarell
  • 2 fedd kvitløk, knuste
  • 2 ½ dl kyllingkraft (eg brukar ofte kyllingfond frå butikken blanda med vatn)
  • ½ dl kvitvinseddik
  • 1 ½ dl fløte
  • 1 ss tørka estragon
  • salt & pepar
  • olivenolje + smør, til steiking

Til servering:

  • omnssteikte potetbåtar/hasselbackpoteter etc.
  • ruccula eller annan grøn salat

[/recipe-foody]

Forvarm steikeomnen til 200 ºC.

Varm opp ei steikepanne med høge kantar som rommer litt. Steik kantarellen gylden i ei blanding av olivenolje og smør. Legg kantarellen til sides til seinare. Dersom du brukar heil kylling deler du den opp i fire stykker; to lår og to kyllingbryst (gjerne med kyllingvingane på). Lat skinnet sitte på. Krydre med salt og pepar. Legg kyllingen med skinnsida ned og steik på middels høg varme til skinnet har blitt gyldent og sprøtt. Snu kyllingen og steik vidare i eit par minutt slik du får steikeskorpe. Ha i knuste kvitløksfedd i panna saman med kvitvinseddik og kyllingkraft og gi det eit oppkok. Strø over ca. halvparten av estragonen og set heile panna inn i forvarma steikeomn. Lat stå i ca. 25-30 minutt, eller til kyllingen er gjennomsteikt. Dette kan du sjekke ved å stikke ein skarp kniv inn i leddet ved sida av låret. Dersom det kjem ut klar kjøtsaft er kyllingen ferdig, men er det rosa eller blodig må den stå litt lenger.

Når kyllingen er ferdig tek du panna ut av omnen og legg kyllingstykka over på eit fat. Dekk med aluminiumsfolie slik det held seg varmt. Set panna på plata (husk å bruke grytevott på glovarmt handtak) og ha i fløten. Gi det eit forsiktig oppkok og smak til med salt og pepar etter behov. Ha i kantarell. Legg kyllingstykka tilbake i panna slik det trekk til seg krafta frå undersida. Strø over estragon på toppen og server med valfrie poteter og grøn salat.

Legg ved ein kommentar

Epostadressa di blir ikkje synleg.

*