Kvit bacalao

[dropcap]B[/dropcap]acalao er eit nydeleg festmåltid og det finnest eit hav av forskjellige typar. Denne gongen er det kvit bacalao med masse fløte, løk og sprøsteikt bacon og chorizopølse på menyen.

I Portugal har dei vel 365 forskjellige måtar å lage denne herligheita på, altså ein type for kvar dag i året. Bacalao har vore fast inventar i barndomsheimen min med jamne mellomrom. Då var det den meir “originale” varianten her omkring i traktene med tomat, poteter, oliven og chili i kraft. Etter å ha smakt kvit bacalo klarer eg ikkje heilt  bestemme meg for kva for ein type som er favoritt. Alt til si tid får eg vel seie.

Denne oppskrifta har vandra frå person til person og blitt forandra undervegs. Opphavet til retten fekk eg sjølv via ein gjeng med kjekke karar som har mat-og vinklubb (takk for oppskrift og inspirasjon). Derifrå har retten fått nokre små justeringar frå meg også, slik eg har fått min eigen vri på retten. Vinaigretten som blir servert ved sidan av på salaten skal eg derimot ikkje ha noko ære for, men den var rett og slett for god til å ikkje ta med! Oppskrifta er på ein veldig stor porsjon med bacalao som kan serverast til eit middagsselskap på 10-12 personar, men halver oppskrifta gjerne slik det er tilpassa ein familiestørrelse på 5 personar.

DSC_0524

[recipe-foody]Ingrediensar til kvit bacalao for ca. 10 personar:

Bacalao:

  • 1, 8 kg klippfisk (ferdig utvatna og delt i små stykker)
  • 2 ½ kg kokefaste poteter
  • 9 dl matfløte
  • ca. 4 dl kremfløte
  • 5 kvitløksfedd
  • 4 små raude chili
  • 3 spisspaprika
  • 3 store rødløk
  • 250 g chorizopølse
  • 200 g bacon
  • ca. 100 g soltørka tomat
  • 50 g pinjekjerner
  • reven ost ( jarlsberg, gouda etc.)

Vinaigrettedressing:

  • 1 dl balsamicoeddik
  • 3 ss dijonsennep
  • 3 ss akasiehonning
  • 2 små sjalottløk
  • 2 fedd kvitløk
  • ¼ ts salt
  • ¼ ts peppar
  • 2 ½ dl olivenolje

Til servering:

  • grøn salat (crispysalat, ruccula, feldtsalat)
  • evt. brød

[/recipe-foody]

Forvarm steikeovnen til 200 ºC.

Skjær potetene i ca. 1 cm tjukke skiver og finhakk chili og kvitløk. Ha det i ein stor kjele saman med all fløten og la det koke opp forsiktig på medium varme. Rør rundt i det litt innimellom og pass på slik det ikkje brenner seg fast i botnen på kjelen. La potetene småputre til dei er blitt møre og såvidt har litt motstand når du stikk ein gaffel gjennom. Sett til sides.

Skjær rødløk og paprika i terningar og steik det i litt olivenolje i ei steikepanne til løken er blitt mjuk og blank. Skjær soltørka tomat i små bitar og tilsett i løkblandinga og la surre med eit par minutter.

Varm opp ei tørr steikepanne og rist pinjekjernene på høg varme i ca.1 minutt medan du rører rundt litt i dei slik dei får litt farge på alle sider. Sett til sides. Skjær så bacon og chorizopølse i terningar og sprøsteik det i steikepanna. Ha så dei sprøstekte bacon-og chorizobitane og løk-og paprikablandinga over i potetene og fløten og bland det godt utan at du mosar potetbitane. Ha halvparten av potetblandinga utover i ei passande ildfast form. Deretter strør du halvparten av pinjekjernene over. Legg all klippfisken utover i eit lag oppå potetene og avslutt så med eit lag med resten av potetblandinga og deretter resten av pinjekjernene på toppen. Strø reven ost over toppen og sett inn i den forvarma ovnen og la det steike i ca. 30 minutter, til osten er gylden og sprø.

Medan bacalaoen står i ovnen kan du lage vinaigrettedressingen. Finhakk sjalottløk og knus kvitløksfedda og bland saman med honning, sennep og balsamico i ei skål. Ha så i olivenoljen i ein tynn stråle samtidig som du rører godt rundt. Smak til med salt og peppar og ha over i ei lita glasflaske eller liknande som egnar seg til å riste før servering då dressingen kan skille seg litt når den står.

DSC_0549

Server kvit bacalao saman med ein grøn salat og vinaigrettedressing til og nyt eit fantastisk måltid!

 

Legg ved ein kommentar

Epostadressa di blir ikkje synleg.

*