Sjokoladepavlova med sjokolade- & lakrissaus & moreller

[dropcap]P[/dropcap]avlova er den perfekte dessertkaka å servere no om sommaren når bærsesongen er i full gong. Pavlova smakar nydeleg og friskt med alle typar bær og frukt og kan endrast etter kva som er i sesong eller kva du likar best. Denne varianten er derimot ein litt meir mektig utgave for deg som er glad i sjokolade.

Pavlovaen har god smak av sjokolade i både sjølve marengsen og i sjokolade-og lakrissausen på toppen. Dersom du ønskar ein litt mindre søt dessert kan du også erstatte sjokoladesausen med rein lakrissirup eller kirsebærsaus. Sjølv er eg glad i mørk sjokolade og dei aller fleste kaker og dessertar med intens sjokoladesmak. Moreller eller kirsebær smakar også nydeleg saman med både sjokolade og lakris og var eit sjølvsagt valg til nettopp denne kaka. Sjølve pavlovaen anbefalar eg at du lagar dagen før du skal servere den slik at den får avkjølt seg heilt og er blitt tørr og sprø. Sjokoladesausen kan du lage ganske nær inntil servering i og med at den bør brukast lunken sidan den stivnar når den blir kald. Lagar du den på førehand kan du derimot sette glaset i glovarmt vatn slik den smeltar igjen.

DSC00208

[recipe-foody]Ingrediensar til sjokoladepavlova for ca. 10-12 personar:

Sjokoladepavlova:

  • 140 g eggekviter
  • 250 g sukker
  • 1 ss maizena
  • 1 ts eddik
  • ½ vaniljestang, frøa
  • 1 ss varmt vatn
  • 100 g mørk kokesjokolade

Sjokolade-og lakrissaus:

  • 75 g demerarasukker
  • 1 dl vatn
  • 1 ss raw lakrispulver (Johan Bülow)
  • 1 ts lys sirup
  • 200 g mørk kokesjokolade (55-60 % kakaoinnhald)

Krem:

  • 2-3 dl kremfløte
  • 4 ss crème fraÎche
  • moreller, til servering

[/recipe-foody]

Forvarm steikeovnen til 140 ºC.

Finhakk kokesjokoladen og smelt den over vannbad på lav varme til du har ein glatt og skinnande sjokolade. Avkjøl litt medan du lagar marengsen. Ha eggekviter, sukker, maizena, eddik, vaniljefrø og til slutt varmt vatn i ein bolle og pisk det til stiv marengs på høg hastigheit, i ca. 10 minutter minimum. Marengsen skal vere stiv og ha ein glatt og skinnande utsjånad når den er ferdig. Hell den noko avkjølte sjokoladen over i marengsen og bruk ein slikkepott til å vende inn sjokoladen i marengsen nokre få gongar slik du får ei lett marmorering. Fordel marengsen utover i ein sirkel på ca. 20 cm på eit bakepapirkledd steikebrett og sett midt i den forvarma steikeovnen. La pavlovaen steike i ca. 1 time og 20 minutter, då skal den vere heva litt og ha blitt sprø. Skru av ovnen og la pavlovaen stå til ovnen er kald, gjerne til neste dag.

For å lage sjokoladesausen har du demerarasukker, vatn, lakrispulver og sirup i ein kjele og gir det eit lite oppkok. La deretter småputre på lav varme i 5 minutter. Finhakk sjokoladen og ha den i ein bolle. Hell den varme væska i kjelen over sjokoladen og rør rundt til du får ein skinnande glatt og tjukk sjokoladesaus. Avkjøl litt før du brukar den på pavlovaen. Oppbevar gjerne på tett glaskrukke.

Pisk kremfløte og crème fraÎche til stiv krem og fordel over den sprø marengsen. Ha deretter ønska mengde med sjokoladesaus oppå kremen. Sjokoladesausen som er til overs kan du bruke på pannekaker og andre dessertar. Topp til slutt pavlovaen med masse moreller og server umiddelbart.

DSC00217

2 Kommentarar

  1. Såg fantastisk ut – men kva tenker du om å ta vekk lakrispulveret, for oss som ikkje er så glad i lakrissmak?? Bør det erstattast av noko anna? Blir det for søtt, utan lakris til å balansere?

    • Hei! Det kan bli litt meir mektig og tungt på smak uten lakrissmaken. Så då ville eg eventuelt servert det saman med ein frisk bærsaus i tillegg eller eventuelt med fleire typar syrlege bær til. Lykke til med eksperiment både med eller uten lakris iallefall! 🙂

Legg ved ein kommentar

Epostadressa di blir ikkje synleg.

*